Psa 10 | TUCO | STEP | O Yoova, pughu vena to uyoon saguan payou ve uul ghou maau? Vena to naneep ila pataŋani lolo, ve uyooŋ payou ne?

aMbo 14:1

bMbo 73:3+

cLu 12:16+; Syg 18:7

dRo 3:14

eMbo 64:5, 94:7

fMbo 68:5, 146:7+

g1Tim 1:17

Psalms 10

Ŋgeu eez ighason Yoova pa ighur atia iŋarua koia

1 O Yoova, pughu vena to uyoon saguan payou ve uul ghou maau?
Vena to naneep ila pataŋani lolo, ve uyooŋ payou ne?
2 Ndiran samsamia tipapait taudi, ve tinanaan yes mbolaaŋa to tirau mbeb eta maau.
Eemoghon ŋgar todi samia to matadi iŋgali, nene pale imuul pa taudi ve iwaghamun di.

3 Ndiran samsamia tipakur taudi pa ŋgar samia to tighamghami.
Moghon moghon, tighamgham ŋgar pa tiyou ledi mbeb, ve tipipiyaav saveeŋ samsamia pa Yoova, ve tivevelegi.

4 Ndiran samsamia tonowen, tipakur taudi pa ŋgar todi. Tauto lolodi pa tiwatag Maaron maau.
Ŋgar todi iyaryaaŋ tighaze: “Maaron irau ighur pataŋani payou maau. Pasa, Maaron eta ineep maau.” ^a
5 Ve moghon moghon, uraat todi ilaan poia moghon.
Tauto tinidi iza, ve tigham ŋgar pa sawa to pale Maaron iŋgabiiz di ve ighur atia padi ne maau. Ve matadi velegin koiadi kat. ^b

6 Ve matadi iŋgal tighaze: “Mbeb eta irau igham ghei ruŋamai iza ne maau.
Ve pataŋani eta irau ivot payei paam maau. Yei pale nineep poia moghon itaghoni taghoni gha ila.” ^c
7 Saveeŋ samsamia naol, toman kaarom, ve matughezaaŋ ivotvot ila avodi irau sawa isob.
Sawa to tisavia ŋgar samsamia ve pataŋani to tighaze tigham pa tamtoghon, nene igham lolodi poia kat inimale tighan aniiŋ poia. ^d

8 Yes tiyoŋyooŋ ila ndug dige, ve tisasaŋan tamtoghon popoiadi.
Tiyooŋ ve matadi inesnes pa yes to tirau malmal maau.
Leso tisavag di, ve tirab di timaat.

9 Yes tiyoŋyooŋ ve tisasaŋan tinimale laion to ineep ila su lolo ve mata ivotvot.
Tisasaŋan, leso tisavag yes to tirau malmal maau.
Ighaze tisavag di ila malum todi, ghoro tikis di ve tiweu di tila.
10 Tovenen neneeŋadi ve tisasaŋan pa tisavag di.
Sawa to ighaze eta peria, ghoro tisavagi.
11 Ve matadi iŋgal tighaze: “Maaron mata inim payei maau.
Ŋgar to yei nighami, ye irau ighita maau, ve iwatagi maau.” ^e
12 Oyai, Yoova, umundig upatooŋ tapirim padi lak!
Maaron tiei, yes to tinumeer ghom ve timbadbaad pataŋani, lolom imaagh padi malep.

13 Maaron, pughu vena to yom upul ndiran samsamia tiveleg ghom?
Yes tisavsaav ila lolodi tighaze: “Ŋgar to yei nighami, Maaron irau ipayoon ghei pa savsaveeŋ maau.”
14 Eemoghon Maaron, yom ughita ŋgar tisob to tigham di ne.
Ŋgar samsamia ve pataŋani naol to yes tigham pa tamtoghon, yom uwatag di tisob, ve tineep ila nimam.
Pasa, yes mbolaaŋa to tirau mbeb eta maau, tighur taudi tilat nimam ve tinumeer ghom.
Yom taum to unum ulaaŋa pa yes parooŋa. ^f

15 Eemoghon ndiran samsamia to tighamgham didiaaŋ, urab matin tapiridi.
Uyat ŋgar todi samsamia. Leso ivot muul sob.
16 Yoova, ye kinik tiina to ighamgham pooz. To aazne, ve itaghoni taghoni gha ila.
Ndug ndug to tiwatagi maau ve tineep ila taan toni, ye pale ipasob di le tisob kat. ^g
17 O Yoova, yes to tinumeer ghom ve timbadbaad pataŋani, yom uwatag lolodi wa.
Yom pale ughur taliŋam pa taŋiiz todi, ve upalot di.

18 Yes parooŋa ve yes to koiadi tighur pataŋani padi, yom taum pale uyoon padi ve uul di, ve ughur atia pa koiadi.
Leso tamtoghon sorok to taan tipamatughezan ndug muul sob.